आपली मानसिकता कधी बदलवणार ???

आम्ही चांगलं शिकून कुठल्याही मोठ्या पदावर चिकटलो किंवा डॉक्टर / इंजिनिअर च्या रांगेत जावून बसलो तरी आम्हाला सुशिक्षित म्हणावं की नाही, या प्रश्नाचा गुंता सुटता सुटत नाही. आमच्या मानसिकतेत बदल करण्याची गरज आम्हाला अजून पर्यंत वाटत नाही. आमच्याकडे फोन स्मार्ट आले, पण आम्ही स्मार्ट कधी होणार …. असले निरर्थक प्रश्न आम्हाला भेडसावत नाही ! आमच्याकडे सगळ्यासाठी वेळ आहे, पण स्वत:च्याच विचारांवर विचार करण्यचा विचार आमच्या मेंदूच्या जवळपास पण फिरकत नाही.

भर चौकात, भर रस्त्यात - आई-बहिणी वर गलिच्छातल्या गलिच्छ शिव्या द्यायला आम्ही मर्दानगी समजतो. अगदी त्या शिव्यांमधील प्रत्येक अक्षराचा अर्थ आम्हाला ठावूक असून देखील, आजूबाजूला कोणी लेकुरवाळ, कोणी महिला वा वयोवृद्ध तर नाहीत , याची आम्हाला फिकीर नसते …. पण 'SEX' हा नुसता शब्द देखील उच्चारताना आम्ही दाही दिशांकडे नजर टाकतो.

अहो आम्ही सुसंस्कृत ना …. सुसंस्कारांचा परिणाम … दूसऱं काय !

आमच्या मनात दर सेकंदाला अगणित घाण विचार आले तरी चालतात, पण तेच एका स्त्री पात्राने, महिलेने 'SEX' / 'निरोध' असले शब्द उच्चारले तरी ती 'त्या टाईप' ची होवून जाते. पुरुष बिअर-बार मध्ये जावू शकतो …. Dance बार मध्ये मिरवू शकतो …. Overnight Stay असणाऱ्या सहली attend करू शकतो , पण त्याच्या मादीने असा कुठलाही प्रकार केलेला त्याला खपत नाही. अशाने त्याची 'सामाजिक प्रतिष्टा' धुळीत मिळते. सुशिक्षित ना ……।

आजही बऱ्याच पुरुषांसाठी स्त्रीया या 'Kitchen' आणि 'Bed' पुरत्याच मर्यादित राहतात, हे बघून-ऐकून आपण खरंच 'SMART PHONE' वाल्यांच्या युगात आहोत, हा विश्वास बसत नाही. मानसिकता ही आपोआप घडत असली तरी ती आपोआप बदलत नसते. आणि तो बदल घडवून आणण्यासाठी 'स्वत:च्याच विचारांवर खोल विचार करण्याची आवश्यकता असते.


(सदर लेख इथून संकलित केला आहे.)

विचार- मंगेश सपकाळ.
--------------------------------------------------------------